Fzt. Mustafa Önal

Fîzyoterapî û Rehabîlîtasyon, beşeke tenduristîyê ye. Ev beş, li zanîngehan ji 4 salan (lîsans) pêk tê. Kesên vê beşê biqedînin wekî “fîzyoterapîst” tên bi nav kirin. Li zanîngehan beşa fîzyoterapîyê ya 2 salan jî heye. Destûrdarên vê beşê jî wekî “Teknîkerên Fîzyoterapîyê” tên pênase kirin.

Fîzyoterapîst; li gor êşnasîya bijîşk ji bo nexweşan bernameya fîzyoterapî û rehabîlîtasyonê amade dikin. Herwiha ji bo rêlibergirtna pirsgirêkan ji kesên tendurist re jî bernameyên fîzyoterapîyê amade dikin û disepînin.

Fîzyoterapî û rehabîlîtasyon, ji bo başkirin û rêlibergirtina gelek nexweşîyan bibandor e. Rêbazên fîzyoterapîyê pir in.

Çend Rêbazên Fîzyoterapîyê

  • Manûel Terapî (Manual Therapy)

Em dikarin manûel terapîyê, wekî terapîya destan bi nav bikin. Bi kurtasî ji hemû rêbazên ku fîzyoterapîst, ji bo başkirina nexweşan, dikin re tên gotin. Êşê kêm dike yan jî holê radike lê çareserîya wê bi tena serê xwe demkî ye. Bi vê rêbazê re divê ji bo nexweşan bernameyên egzersîzan bên amade kirin.

  • Egzersîz

Egzersîz, çeka fîzyoterapîstan e. Ji bo başkirina pirsgirêkan rêbazeke bibandor e û encamên wê jî domdar in. Ji bo tenduristîyê pêdivîyeke girîng e.

  • Elektroterapî

Ji navê elektroterapîyê jî dîyar e ku rêbazeke bi elektrîkê re têkildar e. Ji bo başkirinê ceryan tê bi kar anîn. Ji bo vê jî alavên taybet hatine çêkirin. TENS, Ultrason, ESWT, Traksîyon, NMES hinek rêbazên elektroterapîyê ne.

  • Germ û Cemidî (Sar)

Ji bo bûyer û pirsgirêkên nû (heta 72 saetan) cemed an jî tiştên cemidî, ji bo pirsgirêkên êdî dem di ser wan da derbasbûne û xetereya werimîn û birîndarbûnê nemane an jî domdar (kronîk) germahî tê bi kar anîn.

Ji bo ku werm, germî, êş kêm bibin divê cemed bê bi kar anîn. 10-15 dk. sepandina cemedê bes e. Heta ku werm hebe divê rojê 3-4 caran cemed bê bi kar anîn lê divê cemed rasterast li ser çerm neyê danîn. Pêwîste cemed di nav kevnik an jî desmaleke tenik da be.

  • Bandkirin

Ji bo parastin û rastkirina pirsgirêkên laşî tê bi kar anîn.

  • Hîdroterapî

Hîdroterapî, ji bo zêdekirina gera xwînê û tegerê ji avê sûd wergirtin e.